У палітзняволенай Таццяны Колас у калоніі выявілі рак

У палітзняволенай экс-супрацоўніцы Мінгарвыканкама Таццяны Колас у зняволенні выявілі рак.

Для далейшага абследавання і лячэння жанчыну павінны перавесці ў бальніцу. Але зрабіць гэта плануюць толькі праз некалькі месяцаў. Вядома таксама, што Таццяна пакутуе ад моцнага болю ў спіне, звязанага з перанесеным раней кампрэсійным пераломам пазваночніка.

Навіну пра хваробу беларускі пракаментавала Марына Золатава.

"У палітзняволенай Таццяны Колас выявілі рак. Гэта не проста дрэнная навіна. Гэта жахлівая навіна, бо яна знаходзіцца ў калоніі. Шчыра скажу, мне асабіста практычна не даводзілася сутыкацца з турэмнай медыцынай. Але за той час, пакуль я была ў калоніі (а там я правяла два гады і чатыры месяцы), прынамсі дзве жанчыны памерлі там ад раку. Адна — старэйшая, з майго атрада, у яе быў эканамічны артыкул. Другая — маладзейшая — па 328-м. Зрэшты, артыкул ніякага значэння не мае. Важна, што гэта людзі, гэта жанчыны. У палітзняволенай Ганны Кандраценка рак таксама быў дыягнаставаны ў калоніі, яе нават вазілі на лячэнне ў анкадыспансэр у Гомелі. Яна памерла праз сем месяцаў пасля вызвалення", — распавяла журналістка.

Таццяну Колас затрымалі ў чэрвені 2022 года. У яе ёсць непаўнагадовы сын. Да затрымання жанчына працавала ў Мінгарвыканкаме. Праз тое, што яна мела доступ да асабістых даных сілавікоў, Таццяну абвінавацілі ў перадачы інфармацыі тэлеграм-каналу «Чорная кніга Беларусі».