У траўні беларусы зноў здавалі больш долараў, чым куплялі. Кныровіч патлумачыў, чаму

Беларусы зноў прадалі больш долараў, чым купілі, вынікае з даных Нацбанка.

У траўні фізічныя асобы прадалі валюты на 310,5 млн долараў больш, чым набылі. У красавіку была тая ж тэндэнцыя: беларусы прадалі на 568 млн долараў больш, чым набылі, у сакавіку — на 174,5 млн долараў больш.

Усяго з пачатку года на чыстай аснове беларусы прадалі 953,2 млн долараў.

Еўрарадыё распытала блогера Аляксандра Кныровіча пра тое, чаму беларусы здаюць больш валюты, чым купляюць.

— Гэта з’ява, з якой мы маем справу апошнія тры гады. У гэтай валюты дзве крыніцы. Першая — пераводы родным з-за мяжы. Да майго здзіўлення, гэта стала значным фактарам. Даволі вялікая колькасць людзей з’ехала і дапамагае сваякам. Гэта пацвярджаюць дадзеныя Нацыянальнага банка Польшчы.

Другая крыніца — гэта выплаты беларускім праграмістам. З краіны з’ехала ад чвэрці да траціны айцішнікаў, але частка спецыялістаў засталася ў Беларусі. Іх кампаніі закрыліся, а ў адпаведнасці з беларускім заканадаўствам праграміст як самазаняты можа працаваць непасрэдна на замежную кампанію. І я мяркую, што гэта таксама фарміруе паток грошай.

Можна сабе ўявіць: сярэдні заробак праграміста — амаль 4 тысячы долараў у месяц. А значыць, 10 тысяч чалавек атрымаюць у месяц 40 мільёнаў долараў (чыстымі). Гэта таксама фарміруе лішак валюты.

На дадзены момант валютны рынак Беларусі даволі ўстойлівы, і тое ўмацаванне беларускага рубля да долара, якое мы назіраем, выглядае натуральным.

Фізічныя асобы ў Беларусі за 2025 год прадалі на 1,63 млрд долараў замежнай валюты больш, чым купілі.