У ваенкаматы сталі выклікаць беларусаў, непрыдатных для службы ў мірны час

У ваенкаматы сталі выклікаць некаторых ваеннаабавязаных з катэгорыяй прыдатнасці НГМ (непрыдатны ў мірны час), якім споўнілася 27 гадоў. Там правяраюць, ці застаўся ў іх дыягназ, які вызваляе ад службы, піша выданне "Зеркало".

Юрысты сэрвісу povestka.pro кажуць, што ніколі не сутыкаліся з такімі выклікамі да вясны 2026 года. Прадстаўнікі сэрвісу кажуць, што выклікаюць не ўсіх людзей з катэгорыяй НГМ — ім вядома толькі пра некалькі выпадкаў.

Катэгорыя прыдатнасці НГМ азначае, што малады чалавек не прыдатны да ваеннай службы ў мірны час і абмежавана прыдатны — у ваенны час. Такіх людзей залічваюць у запас Узброеных Сіл. Аднак не менш чым раз у тры гады ім прызначаюць медыцынскі пераагляд, бо сітуацыя са здароўем можа мяняцца.

Аднак юрысты адзначаюць, што гэтая норма не дзейнічае пасля 27 гадоў. "Адпаведна, у ваенкамата да іх не павінна быць ніякіх пытанняў", — кажа Аляксандр, юрыст з 12-гадовым стажам.

Ён мяркуе, што Мінабароны правярае, ці змяніўся стан здароўя, каб памяняць катэгорыю. Бо людзей з катэгорыі НГМ не выклікаюць нават на вайсковыя зборы.

Калі ж катэгорыю зменяць, ваеннабавязанага могуць выклікаць на зборы, нават калі ён не служыў у войску. Юрысты рэкамендуюць у такім разе абскардзіць такое рашэнне ў вышэйшым ваенкамаце — у абласным ці горада Мінска.

Пра тое, што было з 27-гадовымі маладымі людзьмі з НГМ, якія пагадзіліся прайсці пераагляд, юрыстам povestka.pro пакуль невядома.