У Беларусі правялі вучэнні па "дэакупацыі населенага пункта" разам з расіянамі
Вучэнні на палігоне "Белая Лужа" / "Ваяр"
У Мінскай вобласці на палігоне "Белая Лужа" прайшлі вучэнні з удзелам беларускіх вайскоўцаў, а таксама супрацоўнікаў Следчага камітэта і Дзяржкамітэта судовых экспертызаў. Акрамя беларусаў удзел у і прынялі супрацоўнікі расійскага Следчага камітэта, "якія маюць рэальны баявы досвед".
У Мінабароны заяўляюць, што трэніроўкі праводзяцца планава і накіраваныя на адпрацоўку сумесных дзеянняў ва ўмовах узброенага канфлікту.
У вучэннях прайгравалася абстаноўка ўзброенага захопу населенага пункта і яго наступнага вызвалення. "Акрамя таго, адпрацаваныя навыкі тактычнай медыцыны і пытанні асабістай бяспекі з пункту гледжання магчымай атакі праціўніка, уключаючы прымяненне ўдарных БПЛА", — заявіў старшыня Следчага камітэта Канстанцін Бычак.
У рамках вучэнняў быў выстаўлены блокпост ваеннай камендатуры. Адпрацоўваліся дагляд цывільнага чалавека, які спрабаваў прайсці праз пост, дагляд машыны, а таксама ўцёкі фігуранта і яго затрыманне.
