У Беларусі пачалі трэніроўку па ўжыванні ядзернай зброі

18 траўня ў Беларусі пачалася трэніроўка вайсковых часцей баявога прымянення ядзернай зброі і ядзернага забеспячэння. Кіруе ёй начальнік Генштаба Узброеных Сіл – першы намеснік міністра абароны.

Мэтай трэніроўкі называюць удасканаленне ўзроўню падрыхтоўкі асабістага складу, праверку гатоўнасці узбраення і тэхнікі да выканання задач і арганізацыю баявога прымянення з няпланавых раёнаў.

"Для правядзення мерапрыемства прыцягваюцца вайсковыя часці ракетных войскаў і авіяцыі. Падчас трэніроўкі ва ўзаемадзеянні з расійскім бокам плануецца адпрацаваць пытанні дастаўкі ядзерных боепрыпасаў і падрыхтоўкі іх да ўжывання", — заяўляюць у прэс-службе Мінабароны.

Паведамляецца, што праверка гатоўнасці па выкананні баявых заада з непадрыхтаваных раёнаў будзе адбывацца па ўсёй тэрыторыі Беларусі. Асноўны ўпор "будзе рабіцца на адпрацоўку пытанняў утоенасці, перамяшчэння на значныя адлегласці, правядзення разлікаў для прымянення сіл і сродкаў".

У Мінабароны падкрэсліваюць, што гэта планавая трэніроўка, не накіраваная супраць трэціх краін. Таксама заяўляюць, што яна не нясе пагроз бяспецы ў рэгіёне.