У забруджванні ракі ў Лідскім раёне прапагандысты абвінавацілі Захад

У ліпені жыхары Лідчыны паскардзіліся ў прыродаахоўную інспекцыю на забруджванне ракі Дзітвы: у вадзе была мёртвая рыба, а над вадой стаяў смуродны пах.

Спецыялісты абследавалі рэчышча ракі і канал ад ачышчальных збудаванняў. Узятыя пробы паказалі перавышэнне гранічна дапушчальных канцэнтрацый забруджвальных рэчываў. Прыродаахоўнае ведамства паабяцала прыцягнуць вінаватых да адміністрацыйнай адказнасці.

Толькі сёлета гэта ўжо трэці выяўлены выпадак перавышэння нарматываў у скідах з ачышчальных збудаванняў. Агулам жа лідскія жыхары скардзяцца на забруджванне ракі не першы год, піша hrodna.life.

А дзяржаўная газета "Гродзенская праўда" ў матэрыяле пра шматгадовае забруджванне Дзітвы знайшла нечаканых вінаватых у экалагічнай праблеме. Ва ўсім нібыта вінаваты Захад і міжнародныя санкцыі.

Ачышчальныя збудаванні Ліды былі ўведзеныя ў эксплуатацыю ў 1972 годзе. З часам яны перасталі адпавядаць патрэбам горада. У 2011-м сталі шукаць інвестараў для мадэрнізацыі, у 2015-м распрацавалі перадпраектную дакументацыю, а ў 2020-м выбралі падрадчыка. Еўрапейскі банк рэканструкцыі і развіцця быў гатовы падтрымаць праект і вылучыць 9 млн еўра. Але фінансаванне спынілася пасля ўвядзення санкцый. А так бы, кажуць дзяржаўныя прапагандысты, рэканструкцыю завяршылі яшчэ ў 2023 годзе.

Цяпер кошт рэканструкцыі ачышчальных збудаванняў ацэньваецца больш чым у 96 млн рублёў.

Дарэчы, адным з тых, хто паслядоўна змагаўся за вырашэнне праблемы, быў грамадскі актывіст Вітольд Ашурак.