Для кантрабанды або дыверсантаў? Выяўлены падземны тунэль з Беларусі ў Літву

28/07/2026 - 13:51

Памежнікі Літвы паспелі своечасова засыпаць тунэль

Памежнікі Літвы паспелі своечасова засыпаць тунэль / vsat.lrv.lt

Літоўскія памежнікі выявілі тунэль, які вядзе з Беларусі ў Літву, аднак ён яшчэ не меў выхаду на тэрыторыю краіны. Мяркуючы па ўсім, ён быў прызначаны для незаконнай перапраўкі мігрантаў. Улады Літвы засыпалі яго.

Еўрарадыё спытала ў ваеннага эксперта Аляксандра Каваленкі, для чаго можа быць выкарыстаны такі вялікі тунэль, ці толькі для мэт кантрабандыстаў?

Тунэль на глыбіні каля 1,5 метра меў дыяметр прыкладна адзін метр. Ён цягнуўся з глыбіні тэрыторыі Беларусі прыкладна на 5 метраў за лінію дзяржаўнай мяжы ўглыб тэрыторыі Літвы.

Каваленка сцвярджае, што іх можна выкарыстоўваць толькі для пераадолення невялікіх адлегласцей — прыкладна 5–15 метраў, каб незаўважна выйсці на другі бок мяжы.

— У прынцыпе, такія тунэлі могуць выкарыстоўвацца для кантрабанды. Прычым не толькі для таго, каб нелегальныя мігранты маглі пераходзіць праз мяжу, але і для незаконнай перавозкі розных тавараў, — лічыць эксперт.

Але тунэлі могуць выкарыстоўвацца і для дыверсій супраць суседняй дзяржавы.

— Такія тунэлі сапраўды могуць прымяняцца для дыверсійнай дзейнасці. Аднак калі казаць пра напад на краіны Балтыі, то перш за ўсё гаворка ідзе пра буйную агульнавайсковую аперацыю. Для правядзення маштабнай агульнавайсковай аперацыі тунэлі не патрэбны.

Яны могуць быць выкарыстаны, калі ўявіць сцэнарый, пры якім праз іх перакідваюць дыверсійныя групы, каб тыя загадзя падрыхтавалі неабходныя ўмовы перад пачаткам нападу.

Аднак само ўварванне будзе разгортвацца па зусім іншым сцэнарыі — як буйная агульнавайсковая аперацыя з прымяненнем танкавых ударных груповак, бранятанкавых калон, папярэдняй артылерыйскай падрыхтоўкі, агнявога валу, масіраваных бамбардзіровак і іншых сродкаў паражэння. Акрамя таго, будуць выкарыстоўвацца раі беспілотнікаў, якія стануць кантраляваць мясцовасць і ствараць на шляху прасоўвання браніраваных машын так званыя кіл-зоны.

Таму падчас самога ўварвання такія тунэлі не спатрэбяцца. Аднак на этапе падрыхтоўкі нападу іх цалкам можна выкарыстоўваць. Напрыклад, для скрытай перакідкі на асноўныя напрамкі меркаванага прарыву некалькіх дыверсійных груп, якія загадзя арганізуюць дыверсійную дзейнасць, створаць неабходныя ўмовы і тым самым павысяць эфектыўнасць наступнага прарыву мяжы.

Такім чынам, падобныя тунэлі могуць быць карысныя толькі для падрыхтоўкі дыверсійных дзеянняў, але не для правядзення самога нападу. Хоць, калі меркаваць па якасці гэтых збудаванняў, яны ўяўляюць большую небяспеку для тых, хто знаходзіцца ўнутры іх, чым для тых, хто знаходзіцца па другі бок мяжы, — заключае Аляксандр Каваленка.