Украінскія памежнікі ствараюць "кіл-зону" на мяжы з Беларуссю

На мяжы Украіны з Беларуссю ствараецца "кіл-зона". Пра гэта Дзяржаўная памежная служба Украіны (ДПСУ) паведаміла ў адмысловым роліку, апублікаваным 19 ліпеня, звярнула ўвагу выданне "Позірк".

Ствараецца "кіл-зона" для эфектыўнай абароны тэрыторыі ў выпадку паўторнага нападу з боку Беларусі. "Памежнікі рыхтуюцца да магчымага наступу з тэрыторыі Беларусі. Менавіта пра такую пагрозу папярэджвае ўкраінская разведка", — заяўляюць у ДПСУ.

Украінцы называюць частку ўмацаванняў, размешчаных на мяжы з Беларуссю — супрацьтанкавыя равы, шматузроўневыя загароды з калючага дроту, шэрагі бетонных "зубоў дракона". Акрамя таго, памежнікі праводзяць абаронныя мерапрыемствы і на вадзе, у тым ліку на астравах Дняпра. Працягласць украінска-беларускай мяжы па Дняпры складае звыш 100 кіламетраў.

Апошнія гады Украіна сістэматычна ўмацоўвае мяжу з Беларуссю. Гэта выклікана тым, што ў 2022 годзе шырокамаштабны расійскі наступ вёўся ў тым ліку і з тэрыторыі нашай краіны. Таксама сёлета афіцыйны Кіеў неаднаразова папярэджваў, што Расія імкнецца актыўна ўцягнуць Беларусь у вайну супраць Украіны.