Украінскія дроны атакавалі нафтавы тэрмінал у Наварасійску

Украінскія беспілотнікі атакавалі марскі тэрмінал Каспійскага трубаправоднага кансорцыума (КТК) у Наварасійску падчас загрузкі нафты на танкеры. Пра гэта паведаміла прэс-служба кампаніі. Пад ударам апынуліся два судны пад сцягамі Ліберыі і Маршалавых Астравоў з міжнароднымі экіпажамі на борце.

Пасля атакі на адным з танкераў узнік пажар, які ўдалося аператыўна ліквідаваць. Абодва судны захавалі плавучасць, спецыялісты праводзяць ацэнку атрыманых пашкоджанняў. У КТК заявілі, што разліву нафты не зафіксавана, а сярод супрацоўнікаў кампаніі, падрадчыкаў і членаў экіпажаў пацярпелых няма.

З-за інцыдэнту праца марскога тэрмінала была часова спыненая. У КТК назвалі тое, што адбылося, атакай на грамадзянскую інфраструктуру і заявілі, што гэта ўжо пяты падобны інцыдэнт з аб’ектамі кампаніі. Украінскі бок раней паведамляў пра ўдары па расійскіх аб’ектах нафтавай галіны і суднах, якія, паводле яго сцвярджэнняў, звязаныя з расійскім "ценявым флотам".