Вывазныя пошліны на нафтапрадукты выраслі адразу ў 25 разоў
Мазырскі нафтаперапрацоўчы завод / mnpz.by
Урад Беларусі рэзка павялічыў вывазныя пошліны на некаторыя нафтапрадукты. Адпаведную пастанову падпісаў прэм’ер-міністр Аляксандр Турчын. Дакумент апублікаваны на Нацыянальным прававым партале.
У адпаведнасці з ім, пошліна на вываз звадкаваных газаў вырасла з 5,2 да 131,6 долара за тону — больш як у 25 разоў. Таксама значна павялічыліся пошліны для этану, бутану і ізабутану — з 4,6 да 118,4 долара за тону. Хаця дакумент быў ухвалены 7 траўня, новыя стаўкі пачалі дзейнічаць з 1 траўня.
Вывазныя пошліны на прадукты да красавіка 2026 года ў Беларусі ўвогуле не дзейнічалі. Іх вярнулі ў сярэдзіне красавіка, а ў гэтым месяцы істотна павялічылі стаўкі.
Пры высокіх пошлінах кампаніям нявыгадна прадаваць паліва за мяжу, таму яны больш пастаўляюць яго ўнутры краіны. Гэта можа стрымаць рост цэнаў на бензін і дызель.
