ЗША ўвялі санкцыі супраць беларускай кампаніі за дапамогу Ірану
Новыя санкцыі
ЗША пашырылі санкцыі супраць структур, звязаных з ваеннымі закупкамі Ірана. Пад абмежаванні трапіла беларуская кампанія Armory Alliance LLC, а таксама звязаныя з ёй асобы. У Міністэрстве фінансаў ЗША заявілі, што кампанія ўдзельнічала ў схемах паставак узбраення і камплектуючых для іранскіх ваенных праграм.
Паводле звестак амерыканскага боку, іранскі Цэнтр інавацый і тэхналагічнага супрацоўніцтва спрабаваў закупляць у Кітаі ўзбраенне, у тым ліку пераносныя зенітныя ракетныя комплексы. Пасрэднікамі ў гэтых закупках, як сцвярджаюць у Мінфіне ЗША, выступалі беларуская Armory Alliance LLC і ганконгская HK Hesin Industry Co Limited, хаваючы канчатковага атрымальніка прадукцыі — Іран.
8 траўня Упраўленне па кантролі за замежнымі актывамі Міністэрства фінансаў ЗША ўвяло санкцыі супраць 10 фізічных і юрыдычных асоб за дапамогу іранскім ваенным структурам у закупцы зброі, а таксама матэрыялаў для дронаў серыі Shahed і праграмы балістычных ракет.
