ЗША захапілі іранскае грузавое судна
Грузавое судна / US Central Command
19 красавіка 2026 года Ваенна-марскія сілы ЗША ў Аманскім заліве перахапілі іранскае судна, здзейсніўшы ўдар у раён машыннага аддзялення карабля. Пра гэта паведаміў прэзідэнт ЗША Дональд Трамп.
"Сёння грузавое судна пад іранскім сцягам Touska даўжынёй амаль 900 футаў [каля 275 метраў] і водазмяшчэннем, супастаўным з авіяносцам, паспрабавала прарваць нашу марскую блакаду, але ім гэта не ўдалося. Ракетны эсмінец ВМС ЗША Spruance перахапіў “Туску” ў Аманскім заліве і зрабіў ім выразнае папярэджанне спыніцца. Іранскі экіпаж адмовіўся падпарадкавацца, таму наш карабель спыніў іх, прабіўшы адтуліну ў машынным аддзяленні", — напісаў Трамп у сацыяльнай сетцы Truth Social.
Паводле слоў прэзідэнта ЗША, цяпер праводзіцца праверка судна.
Іранскія ўлады назвалі захоп судна "актам пірацтва" і "парушэннем перамір’я" і паабяцалі адказаць.
Армузскі праліў, праз які звычайна пастаўляецца блізкаўсходняя нафта, застаецца закрытым.
Бакі працягваюць абменьвацца пагрозамі. Дональд Трамп абвінаваціў Іран у парушэнні ўмоў перамір’я і зноў прыгразіў Тэгерану знішчэннем крытычнай інфраструктуры краіны, у тым ліку мастоў і электрастанцый.
Іранскія ўлады, у сваю чаргу, абвінавацілі ЗША ў парушэнні перамір’я.
