Звольнілі дырэктара Нацыянальнага гістарычнага музея, лаяльнага да рэжыму

У Нацыянальным гістарычным музеі Беларусі змянілася кіраўніцтва. У гэтым месяцы з пасады дырэктара звольнілі 50‑гадовага Аляксандра Храмога, піша "Наша Ніва". Яго абавязкі цяпер выконвае намесніца, новага кіраўніка пакуль не прызначылі.

Публічна пра звальненне Храмога не паведамлялася. Яго імя проста прыбралі з сайта музея. На суботніку 18 красавіка Лукашэнка ездзіў на будаўніцтва новага Нацыянальнага гістарычнага музея. Замест дырэктара даклад пра музей рабіў нядаўна прызначаны міністр культуры Марат Маркаў.

Храмы стаў дырэктарам музея ў красавіку 2021 года. Да таго часу паспеў папрацаваць вучоным сакратаром у Нацыянальным гісторыка-культурным музеі-запаведніку "Нясвіж" (2011-2013), загадчыкам экспазіцыйна-выставачнага аддзела, намеснікам дырэктара Нацыянальнага гістарычнага музея (2013‑2019). У 2019‑2021 кіраваў Дзяржаўным літаратурна-мемарыяльным музеем Якуба Коласа.

Як дырэктар гістарычнага музея Храмы заяўляў пра поўную лаяльнасць рэжыму. Ён казаў, што падыход да гісторыі вызначаецца "рашэннем прэзідэнта" і беларусы павінны ганарыцца сваёй гісторыяй у зададзенай інтэрпрэтацыі.

Паводле неафіцыйнай інфармацыі новым дырэктарам можа стаць камуніст Сяргей Клішэвіч, які сваю кар'еру выбудоўваў як ідэолаг: быў першым сакратаром Мінскага гаркама БРСМ і ідэолагам Мінгарвыканкама. Цяпер ён дэпутат Палаты прадстаўнікоў.

У 2020-м ён паказваў "фак" аўтамабілістам, якія сігналілі на праспекце Незалежнасці, але вядомы стаў раней. У 2016-м на адкрыцці помніка Леніну ў Мінску дапамагаў амапаўцам затрымліваць Змітра Дашкевіча. Пазней прапаноўваў замяняць настаўнікаў вайсковымі пенсіянерамі, называў анучай нацыянальны сцяг.