Алесь Бяляцкі сустрэўся з папам Львом XIV

Папа Рымскі Леў XIV прывітаў нобелеўскага лаўрэата, беларускага праваабаронцу Алеся Бяляцкага.

Як перадае Радыё Свабода, папа Рымскі на плошчы святога Пятра ў Ватыкане ў адкрытым "папамабілі" дабраслаўляў пілігрымаў. Потым прачытаў Святое Пісанне, а пасля супольнай малітвы індывідуальна прывітаў ганаровых гасцей.

Бяляцкі падчас аўдыенцыі быў побач з іерархамі Каталіцкай царквы ў непасрэднай блізкасці да папы Рымскага. Пасля агульнай аўдыенцыі папа Леў XIV прыняў Алеся Бяляцкага з жонкай Наталляй Пінчук і размаўляў з імі.

Аўдыенцыя папы Рымскага — традыцыйная штотыднёвая сустрэча, якая адбываецца кожную сераду. Пантыфік выступае з казаннем, чытае малітвы і асабіста дабраслаўляе вернікаў.

Як піша "Хрысціянская візія", Бяляцкі перадаў Льву XIV пасланне, у якім ён апісвае сітуацыю з правамі чалавека і свабодай веравызнання ў Беларусі. Ён нагадвае, што ў краіне сёння назічваецца каля тысячы палітвязняў, сярод якіх ёсць жанчыны і пажылыя людзі, хворыя і інваліды, шматдзетныя бацькі. Таксама праваабаронца згадвае пераслед вернікаў і святароў розных канфесій. Бяляцкі дзякуе Святому Пасаду за вызваленне святароў Генрыха Акалатовіча і Анджэя Юхневіча, але дадае, што яны не могуць вярнуцца ў свае парафіі, а іх маёмасць была канфіскаваная.

Праваабаронца піша пра закрыццё каталіцкіх храмаў (у тым ліку касцёла святых Сымона і Алены ў Мінску), скасаванне рэгістрацыі грэка-каталіцкіх абшчынаў, дэпартацыю місіянераў.

Значная частка паслання прысвячаецца вайне Расіі супраць Украіны і ролі, якую адыгрывае ў ёй рэжым Лукашэнкі. Пры гэтым Бяляцкі падкрэслівае, што беларускі народ выступае супраць вайны: больш за 200 грамадзян Беларусі трапілі за краты за крытыку вайны і салідарнасць з украінцамі.

Бяляцкі звярнуўся да папы з просьбай пра малітвуе і публічнае выказванне.