Асуджаны дырэктар-хабарнік з Добруша прынёс "зэкаўскія парадкі" на Віцебшчыну — СМІ

У 2023 годзе ГУБАЗіК гучна затрымаў дырэктара Добрушскага парцалянавага завода Аляксандра Вінакурава і яго роднага брата. Вінакурава вінавацілі ў хабары, а яго брата — у тым, што быў пасярэднікам пры перадачы хабару.

Суд палічыў, што Вінакураў незаконна атрымаў больш за 63 тысячы рублёў. Яму прысудзілі дзевяць гадоў калоніі ўзмоцненага рэжыму, штраф у 28 тысяч рублёў і пяцігадовую забарону займаць кіруючыя пасады.

Аднак прысуджаныя дзевяць гадоў Вінакураў не адседзеў. Ужо сёлета ён быў заўважаны на пасадзе дырэктара ААТ "Мікалаеўскі" Мёрскага раёна. ТГ-канал vitebsk_info знайшоў фота менеджара з Мёршчыны — гэта той самы экс-дырэктар парцалянавага завода, асуджаны за карупцыю.

Выданне піша, што асобай Вінакурава зацікавілася пасля скаргаў з гаспадаркі. Работнікі "Мікалаеўскага" заяўляюць пра ціск, прыніжэнні і фактычна "зэкаўскія парадкі".

Таксама vitebsk_info апублікаваў жахлівыя фота з кароўнікаў у "Мікалаеўскім".

У Беларусі нярэдкія выпадкі, калі гаспадарнікаў, асуджаных за карупцыю, датэрмінова вызваляюць указам Лукашэнкі і прызначаюць кіраваць сельгаспрадпрыемствам. Хутчэй за ўсё, гэта адбылося і ў выпадку Вінакурава.