Беларус Аляксандр Шупеніч стаў чэмпіёнам свету па фехтаванні

32-гадовы чэшскі фехтавальнік Аляксандр Шупеніч упершыню ў сваёй кар’еры заваяваў залаты медаль чэмпіянату свету. У фінале турніру ў Ганконгу спартсмен упэўнена перамог італьянца Філіпа Макі з лікам 15:2 і стаў новым уладальнікам сусветнага тытула, піша Tribuna.

Аляксандр Шупеніч нарадзіўся ў сям’і беларускіх оперных выканаўцаў Івана і Ірыны Шупенічаў, якія пазней пераехалі ў Чэхію. Нягледзячы на выступы пад чэшскім сцягам, спартсмен захоўвае сувязь з беларускім паходжаннем сваёй сям’і.

Да перамогі на чэмпіянаце свету Шупеніч ужо дасягнуў значных поспехаў на міжнароднай арэне. Ён з’яўляецца бронзавым прызёрам Алімпійскіх гульняў 2020 года ў Токіа, а таксама двойчы заваёўваў бронзавыя медалі чэмпіянату Еўропы па фехтаванні.