Лукашэнка, дэмсілы, ЕС: хто першым павінен страціць твар, каб Беларусь выйшла з тупіка

— Лукашэнка не хоча страціць твар, Еўропа не хоча страціць твар. Дэмакратычныя сілы таксама не хочуць страціць твар. Усе стаяць на сваіх вяршынях гэтага трохкутніка, — апісвае рэчаіснасць галоўны рэдактар Belarus Tomorrow Павел Свярдлоў, разбіраючы палітычны крызіс у Беларусі, які таксама можна назваць тупіком.

У эфіры Еўрарадыё ён разам з эксперткай па палітычнай камунікацыі Анастасіяй Касцюговай шукаў адказ на пытанне, хто павінен першым міргнуць у гэтай схватцы, страціць твар, каб пачаўся выхад з палітычнага тупіка.

— Я лічу, што ў сітуацыі, калі ніхто не хоча страціць твар, зрабіць гэта павінен той, каму прасцей за ўсё пайсці на такі крок. Выбачайце за, магчыма, цынічную фармулёўку, але рэчаіснасць менавіта такая. Нехта павінен зрабіць першы крок. Хутчэй за ўсё, гэты крок павінен зрабіць той, хто ў большай ступені думае пра будучыню, чым пра ўласны палітычны капітал, — сцвярджае Касцюгова.

На яе думку — гэты крок першымі могуць зрабіць беларускія дэмсілы. Бо іх прыход да ўлады ў Беларусі практычна немагчымы.

— У гэтым сэнсе грамадзянскаму грамадству і актывістам давядзецца ахвяраваць меншым, калі менавіта яны зробяць першы крок, чым, напрыклад, Еўрапейскаму саюзу. Нехта павінен стаць своеасаблівым амартызуючым звяном паміж Захадам і Беларуссю.

Гэта, дарэчы, адказ на пытанне, навошта ўвогуле патрэбны нейкі дыялог і навошта камусьці размаўляць з намі. Менавіта для гэтага. 

Сёння грамадзянскае грамадства ў выгнанні ўжо не можа зрабіць вельмі многае. Відавочна, што яно не можа самастойна прыйсці да ўлады. У прынцыпе, існуе вельмі мала станоўчых прыкладаў, калі ўрад у выгнанні, не маючы ўнутранай сеткі, якая на працягу многіх гадоў штодзённа стваряла б рэальную сілу ўнутры краіны, змог бы прыйсці да ўлады. Такіх прыкладаў практычна няма.

Цяпер у нас няма такой унутранай сеткі. У нас ёсць толькі знешняя сетка кантактаў. Гэта няшмат, але гэтага дастаткова, каб выкарыстоўваць наяўныя магчымасці, — сцвярджае Касцюгова.

Але для гэтага дэмсілам трэба мяняць рыторыку, адмовіўшыся ад ціску на рэжым Лукашэнкі, лічыць яна.

— Трэба адмовіцца ад пазіцыі: "Мы вас задавім, мы мацнейшыя, зараз выкруцім вам рукі і пасадзім за стол перамоў, дзе будзем абмяркоўваць, як усіх вас адправіць у турму". З падобным падыходам ніхто не пагодзіцца, — упэўнена эксперт па палітычнай камунікацыі.