Чыноўнік абвінаваціў перавозчыка ў выбары небяспечнага маршруту для аўтобуса з дзецьмі

Намеснік старшыні Гомельскага аблвыканкама Дзмітрый Алейнікаў абвінаваціў перавозчыка ў выбары небяспечнага маршруту пры перавозцы групы дзяцей з Рэчыцы ў Геленджык. У выніку атакі дрона пацярпелі восем чалавек, загінула Вікторыя Гарошка — жонка аднаго з трэнераў, якая суправаджала дзяцей у паездцы.

Чыноўнік падкрэсліў, што група была "сабраная бацькамі і трэнерамі ў прыватным парадку".

"Для ажыццяўлення паездкі быў заключаны дагавор з недзяржаўным перавозчыкам, зарэгістраваным у Рэчыцкім і Калінкавіцкім раёнах. Ажыццяўлялася перавозка грамадзян у колькасці 88 чалавек па маршруце Рэчыца — Геленджык. Пры гэтым хацелася б заўважыць, што перавозчыкамі быў абраны небяспечны маршрут, фактычна ўздоўж прыфрантавой зоны", — расказаў Алейнікаў.

Аўтобус з выхаванцамі дзіцяча-юнацкай спартыўнай школы № 2 Рэчыцы быў атакаваны беспілотнікам раніцай 17 чэрвеня ў Бранскай вобласці. Расійскі бок ускладае адказнасць на Украіну.

У Генеральным штабе Узброеных сіл Украіны заяўляюць, што не выкарыстоўвалі дроны ў Бранскай вобласці ў гэты перыяд.

Украінскі ваенны эксперт Аляксандр Каваленка сцвярджае, што дрон павінен быў быць запушчаны з тэрыторыі самой Бранскай вобласці.