У названы перыяд сілы абароны Украіны не ўжывалі БПЛА — Генштаб УСУ

Заявы прадстаўнікоў Расіі пра тое, што аўтобус з дзецьмі ў Бранскай вобласці быў падбіты ўкраінскім беспілотнікам, не адпавядаюць рэчаіснасці. Пра гэта заявіў спікер Генштаба УСУ маёр Андрэй Кавалёў.

"Падкрэсліваем, што ў названы перыяд сілы абароны Украіны не ўжывалі беспілотныя лятальныя апараты па цэлях на тэрыторыі Бранскай вобласці", — перадае выданне "Зеркало" яго словы.

Гэтыя паведамленні ён ацаніў як "чарговую інфармацыйную правакацыю Крамля". Кавалёў дадаў, што Расія не дасягае сваіх мэтаў, нясе значныя страты, таму "ўсё часцей звяртаецца да інфармацыйных маніпуляцый і фабрыкацыі абвінавачванняў супраць Украіны".

Ён нагадаў, што менавіта Расія сістэматычна атакуе ўкраінскія гарады, жылыя кварталы, бальніцы, школы ды іншыя грамадзянскія аб'екты. "У выніку апошніх ракетных удараў па тэрыторыі Украіны, у прыватнасці па Кіеве, загінулі дзясяткі мірных жыхароў, сярод якіх ёсць дзеці", — падкрэсліў Кавалёў.

Узброеныя Сілы Украіны, дадаў ён, наносяць удары выключна па законных ваенных цэлях і не вядуць баявых дзеянняў супраць грамадзянскага насельніцтва.

Ад удару БПЛА ў Бранскай вобласці Расіі зранку 17 чэрвеня пацярпеў аўтобус з беларускімі дзецьмі-футбалістамі, якія ехалі на адпачынак у Геленджык. У выніку ўдару загінула жанчына — жонка трэнера Рэчыцкай ДЮСШ-2, якая суправаджала групу. Восем чалавек былі параненыя, у тым ліку шасцёра дзяцей. Адно дзіця знаходзіцца ў цяжкім стане. Расійскія ўлады абвінавацілі ў гэтым Украіну.