Ці паўплывала рэклама Каца на яўку на выбарах у КР? Хутчэй за ўсё, не

На выбарах у Каардынацыйную раду прагаласавала 2113 беларусаў. Гэта ў тры разы менш, чым у 2024 годзе. Хаця гэтым разам выбары рэкламавалі нават папулярныя “добрыя рускія” блогеры — Ілля Варламаў і Максім Кац.

Але ці паўплывала іх рэклама на яўку? Еўрарадыё атрымала ад тэхнічнага арганізатара выбараў Паўла Лібера даныя пра кожны выдадзены бюлетэнь — то бок мы бачылі толькі час, у які нехта галасаваў, і больш нічога.

Што там з яўкай?

Абедзве рэкламы ў блогера Іллі Варламава былі паказаны да старту галасавання (першая — за суткі, другая — за некалькі гадзін), таму іх уплыў на выбарчы працэс ацаніць немагчыма.

Аднак пік галасавання ў першы дзень — натуральная з’ява. Пры гэтым на працягу яго было аддадзена крыху больш за 20% ад усіх галасоў (менш за 450). То-бок калі нейкі ўплыў варламаўскага прома і быў, то мінімальны.

А вось рэклама ў Каца была апублікавана ў роліку 15 траўня каля 17:00. Ніякага ўсплеску галасавання не было, колькасць бюлетэняў адпавядала сярэднім паказчыкам. Тое ж назіраецца і раніцай 16 траўня. Больш за тое: 15 траўня ўвогуле слабы дзень з пункту гледжання яўкі.

Ніжэй — два графікі: кумулятыўнай колькасці галасоў па кожным дні і “цеплавая мапа”, па якіх можна бачыць дынаміку выдачы бюлетэняў.

Хто плаціў за рэкламу?

Прадстаўнікі блогера Іллі Варламава пацвердзілі, што яна была камерцыйнай. Як высветліла Еўрарадыё, такі слот на прома каштуе чатыры тысячы долараў. Максім Кац заяўляў, што рабіў рэкламу бясплатна.

Спікер Каардынацыйнай рады Арцём Брухан, каментуючы пытанне рэкламы, заяўляў, што яе замаўлялі міжнародныя партнёры. Прасцей кажучы, донары. Пры гэтым з КР ніхто не раіўся.