Еўрасаюз хоча адмовіцца ад прыняцця санкцый "пакетамі" — FT
Еўрасаюз, ілюстрацыйнае фота / Reuters
Еўрасаюз абмяркоўвае новую стратэгію прыняцця санкцый супраць Расіі. У Бруселі хочуць адмовіцца ад "пакетаў" санкцый, каб пазбегнуць вета з боку некаторых дзяржаў. Пра гэта піша Financial Times са спасылкай на ўласныя крыніцы, заўважыла выданне Insider.
Санкцыі прапануюць узгадняць паасобку ці невялікімі тэматычнымі пакетамі. Чыноўнікі ЕС мяркуюць, што гэта знізіць рызыку затрымкі.
Такая мера можа стаць альтэрнатывай буйным "пакетам", якія цяпер прымаюць у Бруселі "дзеля піяру", удакладняе FT.
У мінулы чацвер Еўрасаюз прыняў 21-ы пакет санкцый супраць Расіі — і ён можа стаць апошнім у такім фармаце. "Цяпер цалкам зразумела, што такі падыход больш не працуе", — цытуе выданне адну са сваіх крыніц.
Як паведамлялася, прыняцце пакета запаволілася праз Грэцыю: краіна патрабавала зрабіць выключэнні для сваёй суднаходнай кампаніі Dynagas на перавозку расійскага звадкаванага прыроднага газу. У выніку Бруселю давялося саступіць.
