Рэжысёр Андрэй Кудзіненка быў вымушаны ўцячы з Беларусі
Януш Гаўрылюк і Андрэй Кудзіненка (справа) / facebook.com/bulba.movie.5
Ад пераследу сілавікоў з Беларусі ўцёк рэжысёр, дырэктар прыватнай кінашколы "КінаКалайдар" Андрэй Кудзіненка. Пра гэта ў Фэйсбуку напісаў ягоны сябар, арт-менеджар і рэжысёр Януш Гаўрылюк.
"Беларускія ўлады абвінавацілі яго ў "экстрэмізме". Падчас ператрусаў у ягонай кватэры і ў кінашколе ўдзельнічалі 8 супрацоўнікаў АМАПу і 2 супрацоўнікі КДБ. Ператрусы працягваліся 15 гадзін. У яго забралі пашпарт і тэлефон.
Увага: усе месенджары і акаўнты Андрэя ў сацыяльных сетках цяпер знаходзяцца пад кантролем КДБ", — падзяліўся падрабязнасцямі Гаўрылюк.
Паводле яго, Кудзіненку пагражалі пазбаўленнем волі ад 8 да 12 гадоў.
Андрэй Кудзіненка — аўтар фільмаў "Акупацыя. Містэрыі", "Масакра", шэрагу дакументальных фільмаў для тэлеканала "Белсат", сузаснавальнік кінафэсту Bulbamovie.
