Фонд KinderVita, якому пагражалі крымінальнай справай, пачаў працу ў новым фармаце

У новым фармаце адрадзіў працу фонд KinderVita, які беларускія ўлады ліквідавалі і пагражалі крымінальнай справай. Арганізацыя працягне дапамагаць дзецям з анкалагічнымі захворваннямі.

Каманда праекта абвясціла, што цяпер працуе як валанцёрскі рух "Мы побач". Абвестку пра гэта ў сацсетках заўважыла выданне "Зеркало". Валанцёры паведамілі, што памянялі назву, лагатып і афармленне старонкі, аднак займаюцца той жа дапамогай, што і раней: "Мы па-ранейшаму побач з дзецьмі, якія праходзяць лячэнне ад анкалагічных захворванняў, і з іх сем'ямі".

У камандзе кажуць, што і пасля ліквідацыі "Кіндэрвіты" працягвалі шукаць неабходныя лекі, перадаваць дапамогу і падтрымліваць бацькоў. Удзельнікі кажуць, што валанцёрскі рух "Мы побач" не новы праект. Паводле іх, гэта працяг дзейнасці, якую яшчэ ў 2019 годзе вяла група валанцёраў без зарэгістраванай арганізацыі.

Фонд "Кіндэрвіта" быў ліквідаваны 19 сакавіка рашэннем Галоўнага ўпраўлення юстыцыі Мінгарвыканкама. У арганізацыі назвалі такое рашэнне поўнай нечаканасцю. У фондзе запісалі відэазварот да Лукашэнкі з просьбай адмяніць рашэнне аб ліквідацыі. Пасля таго, як ролік завірусіўся ў сацсетках, у Дэпартаменце фінансавых расследаванняў Камітэта дзяржкантролю заявілі, што разглядаюць пытанне пра крымінальную справу супраць "Кіндэрвіты". У тэлесюжэце казалі, быццам частка сродкаў фонду выдаткоўвалася не па прызначэнні, а асобныя прадстаўнікі, маўляў, удзельнічалі ў пратэстах 2020 года.