МЗКЦ ужывае схемы аплаты наяўнымі грашыма за пастаўляемую прадукцыю

Мінскі завод колавых цягачоў (МЗКЦ) распрацаваў дзве схемы аплаты наяўнымі за пастаўляемую тэхніку і навучанне ваенных спецыялістаў з Аб’яднаных Арабскіх Эміратаў (ААЭ). Усё гэта прадаецца праз кампанію Al Badie Trading Establishment (ATE). Пра гэта распавядае BELPOL у сваім новым расследаванні.

Першая схема выглядае як кур’ерская дастаўка наяўных грошай службовай асобай беларускага прадпрыемства.

У межах гэтай схемы ў ААЭ накіроўваецца высокапастаўлены супрацоўнік МЗКЦ для атрымання грошай непасрэдна. Гэтай даверанай асобай выступае намесніца генеральнага дырэктара па камерцыйных пытаннях Сташук Кацярына Сяргееўна.

У распараджэнні BELPOL ёсць дзве даверанасці, падпісаныя асабіста гендырэктарам МЗКЦ Аляксеем Рымашэўскім.

Паводле дакументаў, Рымашэўскі давярае Кацярыне Сташук прадстаўляць інтарэсы МЗКЦ ва ўстановах ААЭ на тэрыторыі Генеральнага консульства Рэспублікі Беларусь у Дубаі. Даверанасць дае ёй права атрымліваць наяўныя грашовыя сродкі і падпісваць акты прыёму-перадачы.

Так, 25 мая 2022 года МЗКЦ выставіў кампаніі ATE два інвойсы на агульную суму 493 255 долараў ЗША. Ужо 3 чэрвеня Кацярына Сташук перадае амаль аналагічную суму пасылкай консулу Аляксееву Сяргею Віктаравічу проста ў будынку Генконсульства ў Дубаі. Далей грошы адпраўляюцца дыпламатычнай поштай у Беларусь, дзе іх прымае прадстаўнік МЗКЦ Макоўскі Аляксандр Аляксандравіч.

Другая схема — гэта "самавываз" наяўных у Мінск. Яна прасцейшая.

У лісце гендырэктара Рымашэўскага прадстаўнікоў кампаніі ATE запрашаюць прыехаць у Мінск і прывезці з сабой наяўнымі 2 055 451 долар ЗША. Заводакіраванне гарантуе гасцям VIP-зону ў аэрапорце і ўзброенае суправаджэнне да банка.

Часам сістэма давала збой. У распараджэнні BELPOL ёсць ліст Рымашэўскага прэзідэнту кампаніі ATE з прэтэнзіямі.

У канцы сакавіка 2024 года падчас візіту кіраўніцтва МЗКЦ у ААЭ перадача грошай прайшла крайне непрафесійна: у прадстаўнікоў завода не было тэхнічных сродкаў для падліку і праверкі купюр, а значная частка банкнот аказалася парванай, бруднай або пакрытай цвіллю.

Пры гэтым кампанія ATE супраціўлялася патрабаванням замяніць некандзіцыйныя купюры.

Падобныя праблемы ўзнікаюць і па іншых кантрактах, напрыклад, з егіпецкай кампаніяй East West International Trading. У новых дагаворах МЗКЦ цяпер вымушаны прапісваць патрабаванні да якасці купюр дробным шрыфтам на цэлую старонку, спрабуючы застрахавацца ад "заплесневелых" грошай.