На абломках расійскага ўдарнага дрона выявілі павышаны радыяцыйны фон — СБУ
Абломкі расійскай ракеты / СБУ
Павышаны радыяцыйны фон выяўлены на абломках расійскай ракеты, усталяванай на ўдарны дрон "Герань-2". Гэты дрон удзельнічаў у расійскай атацы па Чарнігаўскай вобласці Украіны ў ноч на 7 красавіка 2026 года.
Гаворка ідзе пра фрагменты ракеты Р–60 класа "паветра-паветра", знойдзеныя паблізу пасёлка Камка, паведамляе прэс-служба СБУ. У ведамстве заяўляюць, што такімі ракетамі расіяне страляюць па ўкраінскіх самалётах і верталётах, якія перахопліваюць расійскія дроны.
"Падчас радыяцыйнай разведкі ў непасрэднай блізкасці ад абломкаў варожага беспілотніка з ракетай зафіксаваны ўзровень гама-выпраменьвання 12 мкЗв/гадз., што істотна перавышае натуральны радыяцыйны фон і пагражае здароўю чалавека", — гаворыцца ў паведамленні Службы бяспекі Украіны.
Спецыялісты абясшкодзілі баявую частку ракеты і транспартавалі да месца захоўвання радыеактыўных адкідаў. Па выніках даследаванняў выявілася, што ў склад баявой часткі расійскай ракеты ўваходзяць паражальныя элементы са збедненага ўрану. Іх ідэнтыфікавалі як уран-235 і уран-238.
