На пятніцу ў Беларусі абвясцілі аранжавы ўзровень — чакаюцца дажджы і навальніцы

У пятніцу, 3 ліпеня, у Беларусі прагназуецца пераменная воблачнасць, паведамляе Белгідрамет.

Уначы па паўднёвым усходзе, удзень на большай частцы тэрыторыі краіны пройдуць кароткачасовыя дажджы. Па паўднёвым усходзе ў многіх раёнах, удзень месцамі па Беларусі прагрымяць навальніцы. Пры навальніцах у асобных раёнах па паўднёвым усходзе чакаюцца моцныя залевы. Вецер будзе паўночна-заходні, заходні ўмераны, пры навальніцах парывісты. Месцамі па паўднёвым усходзе чакаецца шквалістае ўзмацненне ветру да 15-20 метраў за секунду. Сіноптыкі абвясцілі аранжавы ўзровень небяспекі.

Тэрмометры ўначы пакажуць 11-17 градусаў вышэй за нуль, па паўднёвым усходзе будзе 18-21 градус цяпла. Удзень паветра прагрэецца ад +21 па паўночным захадзе да +29 градусаў па поўдні Беларусі.

4 і 5 ліпеня ўдзень будзе воблачна з праясненнямі. На большай частцы тэрыторыі краіны пройдуць дажджы, у асобных раёнах прагрымяць навальніцы. Тэрмометры ўдзень пакажуць 16-24 градусы са знакам "плюс".