На вучэннях па разгоне пратэстаў міліцыя трэніравалася ўжываць агнястрэльную зброю
Міліцэйскія вучэнні ў Магілёве / МУС Беларусі
На вучэнннях МУС у Магілёве вучыліся разганяць акцыі пратэсту — у тым ліку з ужываннем агнястрэльнай зброі. Гэта вынікае са словаў міністра ўнутраных спраў Івана Кубракова.
"Як сказаў прэзідэнт, паўтарэння падзей 2020 года ў краіне не будзе. І мы ідзем гэтым шляхам. Таму і праводзім такія трэніроўкі, правяраем гатоўнасць тэхнікі, сіл і сродкаў, асабістага складу да дзеянняў у асаблівых умовах. Калі хтосьці паспрабуе нанесці калецтвы грамадзянам Рэспублікі, супрацоўнікам АУС, усім, хто ўдзельнічае ў спыненні масавых беспарадкаў, трэба ўжываць усе сродкі, у тым ліку агнястрэльную зброю", — перадае прэс-служба МУС словы Кубракова.
Трохдзённыя вучэнні міліцыі ў Магілёве сталі не першымі такімі за апошні час. Перад гэтым аналагічныя вучэнні прайшлі ў Мінску, Брэсцкай і Віцебскай абласцях.
"Гэта чацвёртыя па ліку вучэнні, і відаць, што людзі дзейнічаюць зусім па-іншаму", — пракаментаваў іх кіраўнік МУС.
