Прахадны бал у медуніверсітэты Беларусі знізіўся на 100 балаў. А што здарылася?

У Беларусі прыкметна знізіліся прахадныя балы на медыцынскія спецыяльнасці. Гэта стала адным з наглядных наступстваў рашэння ўладаў адмяніць платнае навучанне ў медыцынскіх ВНУ.

17 ліпеня скончыўся апошні дзень прыёму дакументаў на бюджэт. У суботу пачалі з'яўляцца канчатковыя лічбы.

Напрыклад, у Віцебскім дзяржаўным медыцынскім універсітэце конкурс на бюджэт знізіўся па ўсіх спецыяльнасцях. У гэтым ёсць логіка: колькасць бюджэтных месцаў павялічылася. Аднак асабліва заўважнае падзенне прахадных балаў.

Так, каб паступіць на бюджэт на педыятрычны факультэт ВДМУ, сёлета дастаткова набраць 240 балаў з 400. У мінулым годзе прахадны бал на бюджэт складаў 352, а на платнае навучанне — 340.

Падобная сітуацыя складваецца і на іншых факультэтах. Такім чынам, парог паступлення ў медыцынскія ВНУ прыкметна знізіўся.