Беларусь далучылася да стварэння міжнароднай арганізацыі па ШІ

Беларусь стала адной з 29 краін — сузаснавальніц Сусветнай арганізацыі супрацоўніцтва ў сферы штучнага інтэлекту (САССШІ). Пагадненне аб стварэнні арганізацыі падпісалі 16 ліпеня ў Шанхаі. Яе штаб-кватэра таксама будзе размяшчацца ў гэтым горадзе.

Новая міжурадавая арганізацыя павінна стаць пляцоўкай для міжнароднага супрацоўніцтва ў сферы ШІ, каардынацыі палітыкі і выпрацоўкі агульных правілаў выкарыстання тэхналогій. Сярод заяўленых задач — скарачэнне лічбавага разрыву і садзейнічанне больш даступнаму развіццю штучнага інтэлекту.

Акрамя Беларусі, сярод сузаснавальнікаў САССШІ — Кітай, Расія, Бразілія, Інданезія, Казахстан, Малайзія, Пакістан, ПАР, Сербія, Узбекістан і іншыя краіны. З ініцыятывай стварэння арганізацыі ў 2025 годзе выступіў прэм’ер-міністр Кітая Лі Цян.

Днямі на Еўрарадыё быў эфір, падчас якога навуковец Сяргей Бесараб паразважаў на пытанне, ці з'явіцца ў Беларусі "Бульба-GPT".