"Прынесці вайну ў свядомасць беларусаў": што азначаюць заявы Зяленскага. Меркаванне

Уладзімір Зяленскі паведаміў, што ў Аляксандра Лукашэнкі былі кантакты з расіянамі, якія пераконваюць яго далучыцца да вайны супраць Украіны.

Што азначаюць словы прэзідэнта Украіны? Сваім меркаваннем на гэтую тэму ў эфіры Еўрарадыё падзяліўся гісторык Аляксандр Фрыдман.

— Зяленскі бачыць, як Лукашэнка супрацоўнічае з Расіяй. І, відавочна, ён не забыў 2022 год. Ці магчымы сцэнар, пры якім падзеі 2022 года могуць паўтарыцца? Тэарэтычна — так, магчымы. Практычна пакуль гэта не выглядае асабліва верагодным, — сцвярджае палітычны аглядальнік.

Тады навошта кіраўніцтва Украіны ўсё часцей згадвае Беларусь?

— Сама тэма таго, што новая ваенная аперацыя можа пачацца з беларускай тэрыторыі, з майго пункту гледжання выкарыстоўваецца для таго, каб прынесці вайну ў свядомасць беларусаў, якія жывуць у Беларусі.

Таму што многія людзі, якія цяпер знаходзяцца ў Беларусі, і гэта цалкам лагічна, імкнуцца не заўважаць вайну ва Украіне і проста жыць сваім жыццём. Тым больш што гэтае жыццё ўнутры Беларусі пакуль больш-менш спакойнае і мірнае. Вайна непасрэдна не адчуваецца, і людзі могуць хаця б спрабаваць жыць, не думаючы пастаянна пра тыя жахлівыя падзеі, якія адбываюцца побач.

Украінскі бок, на мой погляд, разлічвае менавіта на тое, каб зрабіць гэтую вайну бліжэйшай для беларускага грамадства. Каб людзі, якія жывуць у Беларусі, думалі пра яе, звярталі на яе ўвагу і адчувалі пагрозу таго, што тое, што цяпер адбываецца ва Украіне, тэарэтычна можа адбыцца і на беларускай тэрыторыі.

Фактычна гэта спроба ўскалыхнуць адносна стабільную ўнутраную сітуацыю ў Беларусі. І для Лукашэнкі гэта непрыемна. Ён разумее, што гаворка ідзе пра своеасаблівую інфармацыйна-прапагандысцкую вайну, якую Украіна вядзе супраць яго, — упэўнены Фрыдман.

Гэта інфармацыйная вайна. І Лукашэнка тут, як ні дзіўна, падыгрывае Украіне.

— Лукашэнка супрацоўнічае з Расіяй у вайне супраць Украіны, ён з’яўляецца саўдзельнікам гэтай вайны. Адпаведна, Украіна адказвае інфармацыйнымі аперацыямі.

І трэба сказаць, што Лукашэнка сам сваім стылем камунікацыі часткова дапамагае ўкраінскаму боку. Чым больш ён гаворыць пра вайну, пра падрыхтоўку да яе, выкарыстоўвае такія словы, як "мабілізацыя" і падобныя рэчы, тым прасцей Украіне падхопліваць гэтыя заявы і казаць: "Вось, глядзіце, ён рыхтуецца да вайны", — кажа эксперт.

Пакуль ідзе вайна, рызыка ўцягвання Беларусі будзе заўсёды, упэўнены Фрыдман.

— У сённяшніх умовах, калі Беларусь падтрымлівае Расію ў вайне супраць Украіны, калі сама вайна працягваецца, а Беларусь застаецца памежнай дзяржавай і саюзнікам Расіі, верагоднасць таго, што Беларусь можа больш актыўна ўключыцца ў вайну — праз сваю тэрыторыю або нават праз удзел беларускіх вайскоўцаў, — усё яшчэ існуе.

Магчыма, цяпер гэтая верагоднасць невялікая. І асабіста мне яна таксама не здаецца высокай. Але тэарэтычна такая магчымасць па-ранейшаму застаецца. І яна будзе існаваць увесь час, пакуль працягваецца гэтая вайна, — заключае гісторык.