Расія стварае базы па запуску "шахедаў" каля мяжы з Беларуссю — Свабода

Расійскія дроны, якія атакуюць Украіну, нярэдка ляцяць праз тэрыторыю Беларусі. Сёлета беларускія сілавікі прызналі, што залёты беспілотнікаў адбываюцца практычна штодня. Праўда, не прызналіся, што гэта пераважна расійскія дроны.

Радыё Свабода выявіла і прааналізавала сетку расійскіх аэрадромаў і пускавых комплексаў, пабудаваных апошнімі гадамі каля беларускай мяжы. Першыя расійскія дроны пачалі залятаць у Беларусь у ліпені 2024 года. Гэта супала ў часе з будаўніцтвам маштабных пускавых комплексаў для запуску дронаў каля беларускай мяжы. Такіх пляцовак пабудавана не менш за пяць — у Бранскай, Арлоўскай і Смаленскай абласцях Расіі.

1. Вайсковы аэрадром Шаталава ў Смаленскай вобласці размяшчаецца за 46 км ад мяжы з Беларуссю. Да Магілёва ад яго — 145 км. Аэрадром выкарыстоўваецца з пачатку 2025 года. Акрамя дзвюх стацыянарных пускавых установак для "шахедаў" тут заўважылі сістэмы супрацьпаветранай абароны і імаверны бункер для ўкрыцця дронаў.

2. Комплекс для запуску ўдарных дронаў каля вёскі Цымбулава ў Арлоўскай вобласьці — адзін з найбуйнейшых у свеце. Пабудавалі яго ў 2024 годзе. Ён размяшчаецца за 200 км ад мяжы з Беларуссю. Тут знаходзяцца не менш за 12 дзейных пускавых установак, а таксама могуць рыхтавацца яшчэ восем дадатковых стацыянарных пускавых пазіцыяў. Гэты комплекс працягваюць разбудоўваць.

3. Комплекс запуску "шахедаў" каля гарадскога пасёлка Наўля Бранскай вобласці знаходзіцца за 127 км ад мяжы Беларусі і выкарыстоўваецца з восені 2024 года. Тут узведзеныя тры стацыянарныя стартавыя пазіцыі і каля 16 невялікіх абароненых сховішчаў — імаверна, для захоўвання дронаў. Гэтая пляцоўка таксама працягвае разбудоўвацца.

4. Вайсковы аэрадром Сешча ў Бранскай вобласці размешчаны за 45 км ад мяжы з Беларуссю. Ён выкарыстоўваўся ў 2022–2023 гадах, больш свежых звестак няма. У траўні 2023-га яго атакавалі ўкраінскія беспілотнікі, пасля чаго Сешча амаль перастала фігураваць у паведамленнях як пункт запуску "шахедаў". Аднак аэрадром па-ранейшаму выкарыстоўваюць як важны транспартны вузел расійскай вайсковай авіяцыі.

5. Комплекс запуску дронаў каля вёскі Асавіца ў Бранскай вобласці знаходзіцца на адлегласці 163 км ад мяжы з Беларуссю і выкарыстоўваецца з восені 2025 года. На спадарожнікавым здымку сэрвісу Planet Labs, зробленым 11 студзеня 2026 года, можна ўгледзець не менш за дзве стацыянарныя пускавыя ўстаноўкі, а таксама чатыры невялікія ўмацаваныя сховішчы.