За тыдзень з Украіны ў Беларусь 116 разоў заляталі беспілотнікі — Вальфовіч

Афіцыйны Мінск вінаваціць Украіну ў спробах "паразіць элементы пагранічнай інфраструктуры" беспілотнікамі. Дзяржсакратар Савета бяспекі Беларусі Аляксандр Вальфовіч заявіў, што за апошні тыдзень украінскія дроны 116 разоў перасеклі межы нашай краіны.

"У некаторых выпадках гэта не выпадковыя атакі, а спробы паразіць элементы памежнай інфраструктуры, прыкрываючыся нібыта выпадковымі залётамі", — перадае БЕЛТА яго словы.

Беларускія сілы супрацьпаветранай абароны ўжываліся 59 разоў за гэты перыяд.

Таксама Вальфовіч заявіў, што за апошні месяц на беларуска-ўкраінскай мяжы затрымалі 76 чалавек, якія незаконна прыйшлі з боку Украіны. Паводле яго, частка затрыманых выконвала разведвальныя задачы.

Заявы прагучалі на фоне візіту ў Кіеў лідаркі беларускіх дэмакратычных сілаў Святланы Ціханоўскай. Яе прымаюць на вышэйшым узроўні: адбыліся сустрэчы беларускай дэлегацыі з прэзідэнтам Уладзімірам Зяленскім і міністрам замежных справаў Андрэем Сібігам.