Украіна атакавала ваенны завод у Чабаксарах, з якім супрацоўнічаюць два заводы ў РБ

Пад раніцу серады, 10 чэрвеня, Украіна атакавала расійскі горад Чабаксары. Там загарэўся завод-вытворца антэн для "шахедаў", піша hromadske.

Чабаксары, якія знаходзяцца ў 1000 км ад Украіны, былі атакаваныя мінімум двойчы. Пасля атак пачаўся пажар на абаронным заводзе "ВНИИР-Прогресс". Гэты завод, як адзначае Радыё Свабода, набывае праваднікі і электронную кампанентную базу на беларускіх прадпрыемствах "Інтэграл" і "Планар".

У студзені на адкрыццё новага цэху “Планара” прыязджаў Лукашэнка. Дзяржаўныя медыя тады падкрэслівалі, што цэх быў пабудаваны і гатовы да працы ў рэкордна кароткія тэрміны і на 2 гады раней, чым планавалася.

Падрабязнасці атакі на завод у Чабаксарах паведаміў Уладзімір Зяленскі. У прыватнасці, украінскі прэзідэнт напісаў: "Гэтай ноччу ўкраінскія FP-5 Flamingo пацэлілі ў ваенны завод у Чабаксарах, які забяспечвае войска акупанта кампанентамі для дронаў і ракет. Дзякуй УСУ за трапнасць! Пацэлілі таксама за мінулую ноч ў нафтаперапрацоўчы завод "Куйбышаўскі" ў Самарскім рэгіёне. Адлегласць ад лініі фронту — больш за 900 кіламетраў".