Допыты былых студэнтаў ЕГУ і іх бацькоў праходзяць на Віцебшчыне

У Віцебскай вобласці адбыліся ператрусы ў былых студэнтаў Еўрапейскага гуманітарнага ўніверсітэта, якія скончылі ЕГУ ці пакінулі яго, не завяршыўшы навучанне. Пра некалькі такіх выпадкаў стала вядома праваабаронцам з "Віцебскай Вясны".

Падчас ці пасля ператрусаў следчыя дапытвалі маладых людзей і іх бацькоў. У прыватнасці, іх цікавіла, хто плаціў за навучанне.    

Сёлета ў красавіку рэжым Лукашэнкі прызнаў ЕГУ "экстрэмісцкай арганізацыяй".

Прадстаўнік Віцебскай абласной пракуратуры Дзмітрый Кудраўцаў казаў у каментары дзяржаўным СМІ, што "фінансаваннем экстрэмісцкай дзейнасці" можа лічыцца ў тым ліку аплата навучання ў ЕГУ. Праўда, пакуль што інфармацыі пра пачатыя крымінальныя справы з гэтай нагоды няма.

Прэс-служба ЕГУ ў сваім паведамленні 9 чэрвеня заявіла пра меры падтрымкі студэнтаў: "Былі спрошчаныя адміністрацыйныя працэдуры, звязаныя з арганізацыяй навучання, забяспечаныя магчымасці размяшчэння для студэнтаў, якім можа спатрэбіцца пераезд, а таксама створаныя дадатковыя механізмы кансультавання, якія дазваляюць аператыўна прадастаўляць інфармацыю і індывідуальную падтрымку. ЕГУ таксама цесна супрацоўнічае з літоўскімі ўстановамі і дыпламатычнымі прадстаўніцтвамі па пытаннях віз, відаў на жыхарства, іншых прававых механізмаў, даступных членам супольнасці, а таксама дадатковых магчымасцяў для бяспечнага выезду з Беларусі тых, хто ў гэтым мае патрэбу".