Расійскія памежнікі не дазваляюць беларусам везці бульбу ў Расію
Бульба, ілюстрацыйнае фота / pixabay.com
Расійскія памежнікі пры кантролі на мяжы забараняюць правозіць бульбу з Беларусі. Прычым адпраўляюць назад машыны не толькі з адным-двума мяхамі, але і пасажыраў, якія вязуць сеткі з 3-5 кг бульбы. Як адзначаюць праваабаронцы Mayday, такая практыка існуе ўжо год, але пра яе мала казалі, каб не псаваць адносіны паміж краінамі.
Першы намеснік начальніка Смаленскай мытні Павел Грышанкоў увосень 2025-га ўжо адказваў на скаргі, што памідоры, яблыкі, бульба, якія вязуць з Беларусі, у Расіі ўключаныя ў пералік падкаранціннай прадукцыі. Гэта датычыць і тых, што вырашчаныя на ўласнай падсобнай гаспадарцы. Таму кожная партыя такой прадукцыі павінна мець фітасанітарны сертыфікат, выдадзеным адпаведным органам.
Потым мытнік адзначыў, што памідоры і яблыкі можна ўвозіць у ручной паклажы вагой толькі да 5 кг. А бульбу без сертыфікату ўвозіць нельга зусім — у якой заўгодна колькасці.
