РБ і РФ ствараюць умовы для ўдараў дронамі па Украіне з беларускай тэрыторыі — ISW

Расія і Беларусь падрыхтоўваюць умовы для абгрунтавання дронавай атакі Украіны з беларускай тэрыторыі. Так у амерыканскім Інстытуце вывучэння вайны (ISW) ацанілі ўчарашнія выказванні дзяржсакратара Савета бяспекі Беларусі Аляксандра Вальфовіча.

Ён заявіў, што за апошні тыдзень у Беларусі зафіксавалі 116 спробаў украінскіх беспілотнікаў перасячы мяжу. Таксама Вальфовіч паведаміў, што сілы беларускай СПА за гэты перыяд ужываліся 59 разоў.

На думку аналітыкаў ISW, наземнае ўварванне беларускіх войскаў ва Украіну вельмі малаверагоднае: нарошчванне беларускіх сіл на мяжы з Украінай не назіраецца. Расія таксама не мае рэзерваў, каб падтрымаць беларускае войска пры наземнай агрэсіі.

А вось выкарыстаць беларускую тэрыторыю для паветраных удараў па Украіне — даволі рэальна. Пры гэтым можна заяўляць, быццам гэта "ўдары ў адказ".

"Выкарыстанне беларускай тэрыторыі дазволіла б Расіі праводзіць бесперапынныя ўдары беспілотнікамі па ўкраінскіх наземных лініях сувязі на захадзе і паўночным захадзе Украіны. Цяпер расійскія беспілотнікі не могуць лёгка паражаць іх з высокай дакладнасцю і вялікай карыснай нагрузкай", — кажуць у ISW.

Таксама з беларускай тэрыторыі можна атакаваць аўтамагістраль М-06, якая праходзіць праз заходнія ўкраінскія вобласці, ключавыя шляхі забеспячэння з Польшчы ва Украіну і чыгунку, якая злучае Польшчу і Украіну.