Тры месяцы ў СІЗА ў Беларусі сядзіць француз, які захапляецца цягнікамі

У Беларусі арыштавалі французскага адстаўнога вайскоўца, які захапляецца цягнікамі. Мужчына паехаў з жонкай да яе сваякоў, а апынуўся ў СІЗА, піша "Наша Ніва".

Барыс шмат гадоў служыў афіцэрам у французскім войску, а потым стаў працаваць інжынерам у энергетычнай сферы. Ён з дзяцінства цікавіцца цягнікамі і нават напісаў шэраг артыкулаў пра іх для спецыялізаваных часопісаў.

У красавіку 2026-га Барыс разам з жонкай прыехаў у Беларусь у турыстычную паездку. Падчас візіту француза затрымалі. І ўжо чацвёрты месяц сваякі не маюць афіцыйнай інфармацыі — ні дзе менавіта ён знаходзіцца, ні ў якіх умовах яго ўтрымліваюць. Невядома таксама, ці мае ён доступ да адваката.

Пра гэта расказаў у сацсетках Жульен Рызэ, стрыечны брат Барыса. Паводле яго, Барыс пайшоў фатаграфаваць цягнік у наваколлі. За ім нібыта сачыў беспілотнік. Неўзабаве француза затрымала міліцыя.

Сям'я і сябры Барыса звярталіся ў да кіраўніцтва Францыі, у міністэрствы ўнутраных і замежных спраў, да сенатараў, парламентароў, у амбасады і розныя няўрадавыя арганізацыі. Як сцвярджае Жульен, у адказ яны атрымлівалі толькі паведамленні, што справай займаюцца.