Санкцыі супраць беларускага калію будуць дзейнічаць да канца лютага 2027-га — Будрыс

Літва вядзе з ЗША перамовы пра транзіт беларускага калію. Аднак яшчэ амаль год працягнуць дзейнічаць санкцыі ЕС на гэтыя пастаўкі. Так міністр замежных спраў Літвы Кястуціс Будрыс пракаментаваў звесткі пра неафіцыйны ліст Дзярждэпа ЗША.

Раней паведамлялася, што Злучаныя Штаты прапанавалі Літве, Польшчы і Украіне зняць санкцыі з паставак беларускіх калійных угнаенняў і пралабіраваць зняццё гэтых санкцый у Еўрасаюзе.

"Магу пацвердзіць, што мы вядзем перамовы з ЗША на гэтую тэму. Гэтае пытанне стаіць на парадку дня, мы ўлічваем розныя меркаванні. Аднак хачу адзначыць, што да наступнага года — канца лютага 2027 года — санкцыі супраць Беларусі дзейнічаюць па калійных угнаеннях, няма ніякіх спосабаў, сродкаў ці падстаў пераглядаць што-небудзь на ўзроўні Еўрапейскага Саюза. Гэта не толькі пазіцыя Літвы — гэта еўрапейская пазіцыя. Калі будуць такія дыскусіі або калі будуць такія дыскусіі аб падаўжэнні санкцый, вядома, мы будзем улічваць усе меркаванні нашых партнёраў", — перадае LRT адказ Будрыса.

Ён не пацвердзіў, што Літва атрымала ліст Дзярждэпа ЗША. Міністр толькі сказаў, што Літва мае "розныя зносіны з Дзяржаўным дэпартаментам ці іншымі ўстановамі ЗША".

Пры гэтым Будрыс падкрэсліў, што рашэнне пра санкцыі было не на ўзроўні адной дзяржавы — яго прымаў Еўрасаюз: "Гэта не нацыянальнае рашэнне. Гэта нават не рашэнне дзяржаў рэгіёна, якія мяжуюць з Беларуссю: Латвіі, Польшчы, Літвы. Нават калі мы ўтрох прымем рашэнне, гэта нічога не значыць. Для прыняцця любога іншага рашэння патрэбна аднагалоснасць 27 дзяржаў".

Разам з тым ён заявіў, што не бачыць сэнсу ў цяперашні момант пашыраць санкцыі: "На маю думку, разглядаць нешта ў дадзены момант, не маючы для гэтага юрыдычных і палітычных умоў, — гэта марнаванне часу".