Расійскія парты сталі вузкім месцам для беларускіх грузаў

Па інфармацыі лагістычных кампаній, беларускія грузы ўсё больш пакутуюць ад абмежавання прапускной здольнасці расійскіх партоў. Адзначаецца недахоп флоту, абмежаваныя магутнасці тэрміналаў і недастатковыя магчымасці для далейшага росту перавалкі. 

Такія звесткі былі агучаныя на нарадзе Міністэрства транспарту з удзелам экспедытараў, грузаўладальнікаў і прадстаўнікоў транспартнага рынку. Мерапрыемства прайшло пад старшынствам міністра транспарту і камунікацый Беларусі Аляксея Ляхновіча. Пра гэта піша "Супольнасць чыгуначнікаў Беларусі".

Удзельнікі рынку адзначаюць, што дадатковым негатыўным фактарам з’яўляецца прыярытэтнае размеркаванне рэсурсаў у карысць расійскіх грузаадпраўшчыкаў і аператараў. На практыцы гэта прыводзіць да таго, што беларускія грузы, нават пры стабільнай чыгуначнай падачы, сутыкаюцца з затрымкамі ўжо на партовым этапе. Такія затрымкі могуць цягнуцца тыднямі, адзначаюць экспедытары і лагісты.

Удзельнікі нарады падкрэслілі, што гаворка ідзе ўжо не пра часовыя цяжкасці, а пра сістэмныя і паўтаральныя праблемы, якія паступова набываюць хранічны характар.

Асабліва востра праблема праяўляецца пры працы расійскага порта Бронка, які функцыянуе як кантэйнерны тэрмінал і застаецца ключавым звяном у ланцужку экспартнай кантэйнернай лагістыкі беларускага калію.

Кантэйнерныя перавозкі калію з’явіліся пасля таго, як для Беларусі быў страчаны порт Клайпеды праз ўведзеныя санкцыі. Пры гэтым кантэйнерызацыя калійных грузаў павялічвае кошт перавозак і стварае дадатковую нагрузку на рухомы састаў і тэрмінальную інфраструктуру.