Намесніка старшыні райвыканкама ў Касцюковічах шукаюць праз біржу працы

У Касцюковічах нетрадыцыйным спосабам шукаюць намесніка старшыні райвыканкама, адказнага за развіццё архітэктуры і горадабудаўніцтва, а таксама жыллёвай палітыкі. Адпаведная вакансія з’явілася на сайце службы занятасці, заўважыла "Наша Ніва".

Заробак абяцаюць ад 6 да 7 тысяч рублёў. Ад кандыдата патрабуюць вышэйшую адукацыю, наяўнасць пяцігадовага стажу ў дзяржаўных структурах. Вітаюцца прэтэндэнты з досведам у сферы будаўніцтва.

У аддзеле кадраў журналістам пацвердзілі наяўнасць вакансіі. Але дадалі, што "асноўны кандыдат ужо ў распрацоўцы".

"Кандыдатура праходзіць праверку. Але адпраўляйце рэзюмэ, у вас ёсць усе правы на гэта. Можа, і гэтая кандыдатура не пройдзе ўсе праверкі, бо першая не прайшла. Я раздрукую ваша рэзюмэ, адзначу ўсе даныя. У нас яшчэ два так ляжыць", — пракаментавала чыноўніца.

Старшынёй Касцюковіцкага равыканкама з'яўляецца Наталля Асмалоўская — яе прызначылі на пасаду на пачатку гэтага года.

Папярэдні намеснік старшыні па архітэктуры прабыў на сваёй пасадзе менш за год: Аляксандра Сідарэнку прызначылі ў траўні 2025-га. Яшчэ ў лютым 2026‑га ён праводзіў у сваім кабінеце прамую тэлефонную лінію.