Суд у Кіеве адмовіўся вызваліць з-пад варты беларускую журналістку Іну Кардаш

Суд у Кіеве адхіліў скаргу беларускі Іны Кардаш, якая прасіла вызваліць яе з-пад варты — пад заклад і падпіску аб нявыездзе. Першая судовая інстанцыя пастанавіла трымаць яе пад вартай да 14 чэрвеня.

Кардаш і яе адвакатка, як перадае Радыё Свабода, заяўлялі, што выстаўленыя ёй падазрэнні грунтуюцца "толькі на здагадках і не падмацаваныя ніякімі доказамі".

Аднак судовая калегія вырашыла, што рашэнне было абгрунтаваным, бо падазраваная зможа схавацца ад следства, знішчыць ці прыхаваць істотныя для расследавання рэчы і дакументы, а таксама незаконна ўплываць на сведкаў ці экспертаў. Пры гэтым судовая калегія спаслалася на адпаведныя рашэнні Еўрапейскага суда па правах чалавека.

Беларуску Іну Кардаш затрымалі сёлета 21 студзеня. Яе падазраюць у шпіянажы на карысць беларускага КДБ. На момант затрымання Кардаш працавала ў Каардынацыйным штабе па пытаннях абыходжання з ваеннапалоннымі Галоўнага ўпраўлення разведкі Міністэрства абароны Украіны. Таксама ў СМІ паведамлялася, што яна вербавала для працы на КДБ свайго мужа — добраахвотніка з украінскага войска.

На пачатку траўня кіраўнік сакратарыяту Каардынацыйнага штабу Багдан Ахрыменка казаў, што афіцыйны Мінск цікавіўся магчымасцю абмену Іны Кардаш.