У брыгадзе УСУ, дзе служыць Ціхан Клюкач, ён лічыцца зніклым без вестак

У трэцяй асобнай штурмавой брыгадзе УСУ, дзе служыць беларус Ціхан Клюкач, ён лічыцца зніклым без вестак. Пра гэта ў каментары выданню "Зеркало" паведаміў прадстаўнік Аб'яднанага пераходнага камітэта па абароне Вадзім Кабанчук, каментуючы звесткі пра магчымую гібель каліноўца.

"Наколькі мне вядома, у брыгадзе ён лічыцца зніклым без вестак, таму немагчыма зараз сказаць, што ён загінуў. Пакуль не будзе афіцыйнага паведамлення ад брыгады, дзе ён служыў і па маральных, і па чалавечых каштоўнасцях мы не можам пра гэта казаць", — падкрэсліў Кабанчук.

Невядома, калі і пры якіх акалічнасцях знік Клюкач. Кабанчук не змог ні абвергнуць, ні пацвердзіць дату 9 траўня, якая называлася раней у сацсетках.

Статус "зніклы без вестак" Кабанчук ахарактарызаваў як вельмі шырокі: "Чалавек можа быць без сувязі, можа быць якая-небудзь адрэзаная пазіцыя, дзе складана з камунікацыямі. Ён можа быць у палоне. Калі з чалавекам нешта здарылася, адбываюцца абмены целамі, і ўжо потым ідэнтыфікуюць чалавека — хто ён на самой справе — і пацвярджаюць факт гібелі".

Раней у сацсетках паведамлялася пра гібель каліноўца Ціхана Клюкача, яму сёлета ў ліпені павінна споўніцца 24 гады. У 2021-м ён быў асуджаны ў Беларусі паводле "народнага" 342-га артыкула КК (дзеянні, якія груба парушаюць грамадскі парадак). Адбыўшы пакаранне, хлопец пераехаў ва Украіну, дзе пайшоў на фронт абараняць яе. У Беларусі Клюкача завочна асудзілі яшчэ раз у ліку васьмі каліноўцаў.