У Чэхіі спрабаваў забіць сябе сын беларускага палітуцекача

У Чэхіі спрабаваў забіць сябе сын беларускага палітуцекача. Хлопец хацеў атруціцца вялікай дозай прэгабаліну — гэтыя лекі прызначаюць пры болях і трывозе, піша "Наша Ніва".

Цяпер малады чалавек знаходзіцца ў адной з раённых бальніц, яго трымаюць у рэанімацыйным аддзяленні пад апаратам ШВЛ. Хлопец у коме, яго ўнутраныя органы працуюць, але мозг часткова пашкоджаны.

Бацька жыве ў іншай краіне, але прыехаў у бальніцу, дзе ратуюць сына. Ён хоча пракансультавацца з беларускімі таксіколагамі і неўролагамі, каб пачуць дадатковыя меркаванні спецыялістаў.

Кіраўніца Офіса дэмакратычных сіл у Чэхіі Крысціна Шыянок кажа, што іх структура трымае сувязь з клінікай, дзе ляжыць малады беларус, і ягоным бацькам.

"Таксама па просьбе бацькі мы звярнуліся да беларускіх рэпрэсаваных медыкаў, якія пераехалі ў Чэхію па праграме Medevac, да прадстаўніцы ByMedSol і да старшыні асацыяцыі рускамоўных дактароў у Чэхіі Doktor Čechov з просьбай дапамагчы кантактамі таксіколагаў і неўролагаў", — дадае Шыянок.