У ЕС няма ніякай дыскусіі аб магчымым пераглядзе санкцый супраць Беларусі — Будрыс

Пакуль Беларусь праводзіць гібрыдныя атакі і дапамагае Расіі ў вайне супраць Украіны, пазіцыя Літвы наконт санкцый не зменіцца. Пра гэта заяўляе міністр замежных спраў Літвы Кястуціс Будрыс.

"Вядома, што мы хацелі б суверэнную, незалежную, дэмакратычную Беларусь па суседстве з Літвой. Аднак, гледзячы на ​​цяперашнюю сітуацыю і тыя параметры, якія ў нас ёсць, найважнейшымі для нас з'яўляюцца пытанні, звязаныя з нацыянальнай бяспекай", — перадае яго словы выданне DELFI.

На думку Будрыса, у Літвы няма падставаў змякчаць сваю пазіцыю, пакуль афіцыйны Мінск працягвае ранейшыя дзеянні. Гэткай жа пазіцыі, паводле яго, прытрымліваюцца і ў Бруселі.

"Санкцыі, уведзеныя Еўрапейскім Саюзам, маюць пэўныя падставы: гэта парушэнне правоў чалавека, яны дапамагаюць Расіі ажыццяўляць агрэсію, яны выкрадаюць дзяцей, спрыяюць рэіндактрынацыі выкрадзеных дзяцей і гэтак далей. Пакуль гэтыя падставы не зменяцца, я не магу ўявіць, як Еўрапейскі Саюз мог бы змяніць сваю пазіцыю. Больш за тое, я адкрыю невялікі сакрэт: у Еўрапейскім Саюзе няма ніякай дыскусіі аб магчымым пераглядзе санкцый супраць Беларусі. Там нават няма ніякай дыскусіі, у якую можна было б уступіць, калі б хтосьці нават хацеў, з рознымі аргументамі, таму што ніхто не бачыць ніякіх змен. Таму, мне здаецца, на гэтым трэба пакласці канец, і ўсё", — дадае кіраўнік літоўскай дыпламатыі.

Пры гэтым Будрыс прызнае, што Літва мае чатыры-пяць тэхнічных каналаў для абмену інфармацыяй з афіцыйным Мінскам. Такія сувязі, паводле яго словаў, дазваляюць мінімізаваць пэўныя аварыі, памылкі, шкоду, выкліканую памылкамі, а таксама — папярэджваць абвастрэнне сітуацыі.