У Мінску адкрываецца Музей наіўнага мастацтва

Музей наіўнага мастацтва адкрываецца ў Мінску. Афіцыйнае адкрыццё прызначанае на 4 чэрвеня, але наведаць яго можна ўжо цяпер, бо ён ужо працуе ў тэставым рэжыме, заўважыла "Наша Ніва".

Музей размесціцца па адрасе праспект Пераможцаў, 84 — раней тут быў дзіцячы цэнтр "Карамелька".

Плануецца, што ў прасторы будуць адбывацца выставы творцаў наіўнага мастацтва. Сярод іх будуць і карціны людзей з асаблівасцямі і псіхічнымі дыягназамі. Стваральнікі музея мараць, што творы сусветна вядомых мастакоў будуць у іх суседнічаць з карцінамі бяздомных з вуліц: "Нам пляваць на рэгаліі. Да нас можа трапіць хто заўгодна".

Таксама пры музеі будуць дзейнічаць майстар-класы, на якія можна запісацца ўжо цяпер. Яны каштуюць ад 40 да 109 рублёў з чалавека. На такіх майстар-класах прапануюць, напрыклад, кастамізаваць старыя рэчы, стварыць маляванку сваімі рукамі, навучыцца рабіць арт-калажы ці засвоіць японскую вышыўку сашыка.