Беларускія арганізатары Біенале два месяцы спрачаліся за шар з кніг
Шар з кніг на беларускай частцы Венецыянскай біенале / facebook.com/sergey.grinevich.3
Ключавы экспанат у беларускім павільёне на сёлетняй Венецыянскай біенале — шар з забароненых кніг. Але ж... мы недзе яго бачылі раней?
Велізарны шар з кніг — гэта частка дэкарацый спектакля "Сабакі Еўропы", пастаўленага Беларускім свабодным тэатрам. Куратарка павільёна Даніэла Каляда расказала Еўрарадыё, што два месяцы дыскутавала з бацькам — кіраўніком БСТ Мікалаем Халезіным — і ўсё ж пераканала яго выставіць гэтую працу ў Венецыі:
"Мікалай не хацеў у гэтым удзельнічаць, каб не адцягваць увагу ад мяне. Ён хацеў, каб гэта быў чыста мой праект. Але праца настолькі туды ўпісалася, што без яе было нікуды".
Паводле куратаркі, канцэпцыя беларускага павільёна — "медытацыя на тэму канца свабоды: асабістай і лічбавай". Каманда хацела, каб за 5-7 хвілінаў гледачы зразумелі, "як гэта — знаходзіцца ў Беларусі, з гледзішча ўсіх пяці пачуццяў".
Над зместам павільёна працавалі ў тым ліку кампазітарка Вольга Падгайская, дызайнер Уладзімір Цэслер, мастак Сяргей Грыневіч, шэф-кухар Расмус Мунк.
