Ініцыятыва MALDZIS вяртае беларусам малюнак айчыннага мастака парыжскай школы
"Рабочыя" Восіпа Любіча / MALDZIS
Ініцыятыва MALDZIS вяртае беларусам малюнак Восіпа Любіча "Рабочыя". Яго набылі на аўкцыёне ў Ізраілі на грошы мецэнаткі, якая пажадала захаваць ананімнасць.
Любіч — яркі прадстаўнік парыжскай школы. Мастак нарадзіўся ў Гродне, вучыўся ў Адэсе, у 1920 годзе пераехаў у Берлін, а адтуль — у Парыж. Яго творчасць уключае партрэты, пейзажы, нацюрморты. Але найбольш выразна ён выявіў сябе ў сцэнах з тэатральнага і цыркавога жыцця.
"Рабочыя" выкананыя ў тэхніцы гуашы на паперы і падпісаныя аўтарам. Малюнак датуецца 1920-мі гадамі. Гэта рэдкі прыклад ранняй творчасці беларуска-французскага мастака.
У будучыні MALDZIS плануе перадаць малюнак у Гродна ў якасці грамадскага падарунку.
