У суботу ў Беларусі будзе пераважна без дажджоў і да +24

У суботу, 23 траўня, у Беларусі чакаецца пераменная воблачнасць, паведамляе Белгідрамет.

Будзе пераважна без ападкаў. Уначы і зранку ў асобных раёнах краіны будзе згушчацца слабы туман. Вецер прагназуецца паўночна-заходні — слабы да ўмеранага.

Уначы тэрмометры пакажуць 5-10 градусаў вышэй за нуль, па паўднёвым усходзе краіны чакаецца да 12 градусаў цяпла. Удзень паветра прагрэецца да +18...+24 градусаў.

У нядзелю, 24 траўня, ўначы прагназуецца пераменная воблачнасць, пераважна без ападкаў. Зранку і ўдзень будзе воблачна з праясненнямі, на большай частцы тэрыторыі Беларусі пройдуць кароткачасовыя дажджы, месцамі прагрымяць навальніцы. Вецер будзе заходняй чвэрці ўмераны, зранку і ўдзень — парывісты, пры навальніцах — моцны парывісты.

Тэрмометры ўначы пакажуць 5-12 градусаў цяпла, удзень чакаецца 20-27 градусаў са знакам "плюс".