У суботу на захад Беларусь прыйдуць залевы, навальніцы і шквалісты вецер

У суботу, 18 ліпеня, у Беларусі прагназуецца невялікая воблачнасць, паведамляе Белгідрамет.

Будзе пераважна без ападкаў, толькі ўдзень па захадзе краіны чакаюцца кароткачасовыя навальнічныя дажджы, месцамі пры навальніцах – моцныя залевы. Уначы і зранку ў асобных раёнах чакаецца слабы туман. Вецер будзе паўднёва-ўсходні, паўднёвы, уначы — слабы, удзень — умераны, месцамі парывісты. Пры навальніцах у асобных раёнах чакаецца шквалістае ўзмацненне ветру да 15-20 метраў за секунду.

Тэрмометры ўначы пакажуць ад +8 градусаў па ўсходзе да +20 па захадзе краіны. Удзень чакаецца 23-29 градусаў вышэй за нуль, па Брэсцкай вобласці прагназуецца 30-32 градусы цяпла.

Сіноптыкі абвясцілі аранжавы ўзровень небяспекі.

У нядзелю будзе воблачна з праясненнямі. На большай частцы тэрыторыі краіны пройдуць дажджы, месцамі прагназуюцца моцныя дажджы і навальніцы. Вецер будзе пераменных кірункаў парывісты, удзень пры навальніцах — моцны парывісты. Уначы тэмпература паветра складзе 12-19 градусаў цяпла. Удзень чакаецца ад +21 градуса па поўначы да +30 па паўднёвым усходзе Беларусі.