Узбекскі мігрант, які не знайшоў працы ў Беларусі, вярнуўся на радзіму

Ва Узбекістан з Беларусі вярнуўся адзін з мігрантаў, які не знайшоў працу ў нашай краіне. Вярнуцца яму дапамагла амбасада Узбекістана, піша выданне "Позірк".

Мужчына прыбыў у Беларусь у ліпені. Аднак чалавек, які прапанаваў яму працу, перастаў выходзіць на сувязь. Пасля беспаспяховых спробаў звязацца з працадаўцам працоўны мігрант застаўся без сродкаў да існавання.

Амбасада разам з Агенцтвам па міграцыі Узбекістана набылі яму авіяквіток на радзіму.

Пагадненне аб прыёме працоўных мігрантаў з Узбекістана было падпісанае на пачатку ліпеня, калі ў Беларусь прыязджала дэлегацыя гэтай краіны. 13 ліпеня ў Беларусь прыбыла першая партыя мігрантаў. Напачатку частка работнікаў паскардзілася на кепскія ўмовы пражывання і нізкія заробкі. Яны заявілі, што хочуць вярнуцца ва Узбекістан. Пасля гэтага, як паведамлялася, ім стварылі лепшыя ўмовы і перавялі да іншых працадаўцаў, якія плацілі больш высокія заробкі.